I-ZACC ihlola amacala obugwelegwele angu-517, kubotshwe abangu-90

Nkosilathi Sibanda
IKHOMISHINI yeZimbabwe Anti-Corruption Commission (ZACC) yamukele imbiko engu-517 yobugwelegwele elizweni lonke phakathi kukaZibandlela kusiya kuNcwabakazi lonyaka, njalo isabelo seHarare yiso esilamacala amanengi.
Kusitatimende esikhitshwe nguMgcinisihlalo we-ZACC uMnumzana Michael Reza, uthe ikhomishini yamukele imbiko le phakathi kukaZibandlela 1 loNcwabakazi 31.
Uthe isabelo seHarare silensolo ezingu-339.
IBulawayo yiyo elandelayo ngensolo ezingu-48, iMashonaland West (35), iMashonaland East (27), iMidlands (26), iManicaland (21), iMasvingo (14) kanye leMashonaland Central (7).
I-ZACC ithe ngenxa yezikhalazo lezi lokunye, kwabotshwa abantu abangu-195, amacala angu-128 ayathoniswa emthethwandaba kwabotshwa abantu abangu-90.
Kubikwa abangu-38 bakhululwa.
Amacala angu-325 asathonisiswa emthethwandaba.
I-ZACC iphinde yathi kusukela ngoNcwabakazi 31, 2026, amacala angu-919 aphenywa kuzabelo zonke. Ithe iyaqhubeka ngokulandelela amacala la, kuze kuphele uphenyo.
“Enye yendlela ezisetshenziswa ukulwisa ubugwelegwele yikuthathelwa kwabantu impahla abayithole ngokwephula umthetho,” kutsho iZACC.
Ikhomishini le, iveze ukuthi amacala ahlanganisa impahla lemali elinganiselwa ku-US$5 million adluliselwe kuNational Prosecuting Authority of Zimbabwe (NPA).
Amacala la ahlanganisa la abizwa ngokuthi-Unexplained Wealth Orders, okuyinotho umuntu ayithola ngendlela angeke ayichasise, leCivil Forfeitures, okuyikuthathelwa impahla ngumthethwandaba ngaphansi komthetho womphakathi, kungakhathalekile ukuthi umuntu ugwetshelwe icala lobugwelegwele kumbe hatshi.
Impahla ethethweyo ihlanganisa izimota ezingu-14, isitanda sendlu lemali.
Ekuthathweni kwempahla, uDaniel Kalira wathathelwa imota yeToyota Hilux Double Cab, isitanda sendlu ku-913 eMandara Township lemali.
UBenjamin Nyandoro wathathelwa imota ye-Isuzu single cab, kukanti ngaphansi kwe-Civil Servants Rebate Scheme kwathathwa izimota ezingu-8, ezigoqela iNissan AD Van, Toyota Aqua, Honda Fit, Toyota Passo, Toyota Porte leToyota Vanguard.
UYvonne Musoni wathathelwa imali eyayigcinwe kuma-account ezikolo, kuthi uMathew Musengezi, owaziwa ngokuthi nguMemory Shamu, wathathelwa imota yeToyota Fortuner SUV.
Ekuthathweni kwempahla okusekelwe ekutholakaleni kwecala, uNyandoro wathathelwa imota yeHonda Vezel, kuthi uTanaka Chiwade wathathelwa izimota ezimbili ama-Nissan Caravan.
I-ZACC ikhuthaze uzulu ukuthi aqhubeke ebika amacala obugwelegwele emawofisini abo kunye lakunkundla zokuxhumana.